Turkiyada Uy Sotib Olgan Chet El Fuqarolariga Turk Fuqaroligi Shartlari

Turkiya hukumati tomonidan joriy etilgan ko’chmas mulk orqali fuqarolik dasturiga ko’ra, chet el fuqarolari harbiy hududlar bundan mustasno, Turkiyaning istalgan joyida ko’chmas mulk sotib olish huquqiga ega. 2018-yil sentyabridan boshlab Turkiyada 250 000 dollar va undan ko’proq miqdorga ko’chmas mulk sotib olgan chet el fuqarolari va ularning oila a’zolari Turk fuqaroligiga ega bo’lishi mumkin. Ko’chmas mulk va qurilish sektori jadal rivojlanib borayotgan Turkiyada mulk sotib olish juda foydali investitsiya hisoblanadi.

Turkiyada mulk egasi bo’lishning afzalliklari

Turkiyada uy sotib olgan chet el fuqarolariga Turk fuqaroligi beriladi.

Mulk orqali fuqarolik olish imkoniyati Turkiyada kamida 250 000 dollarga ko’chmas mulk sotib olgan chet el fuqarolari uchun mo’ljallangan. Xaridor va uning oila a’zolari olti oy ichida Turk fuqaroligiga ega bo’lish huquqini qo’lga kiritadi. Ya’ni, Turkiyada ko’chmas mulk sotib olib, ham foydali investitsiya qilish, ham Turk fuqaroligiga ega bo’lish mumkin. Batafsil ma’lumot uchun Turk fuqaroligi bo’yicha maslahat xizmati sahifamizga qarang.

Bundan tashqari, 250 000 dollar va undan yuqori miqdorga mulk sotib olgan holda siz va oila a’zolaringiz uchun 3 yillik yashash ruxsatnomasi olishingiz mumkin. Sotib olingan mulkda uzluksiz 5 yil yashagan taqdirda esa Turk fuqaroligiga ariza berish huquqi vujudga keladi. Muhim eslatma: 5 yil davomida Turkiyadan tashqarida jami 1 yildan ko’p bo’lish mumkin emas — bu talabning maqsadi xorijiyning Turkiyada haqiqatan yashaganini ta’minlashdir.

TURKIYADA KO’CHMAS MULK SOTIB OLGAN CHET EL FUQAROLARI UCHUN YASHASH RUXSATNOMASINI OLISH OSON.

Turkiyada mulk sotib olgan chet el fuqarolari muayyan muddatga berilib, keyinchalik uzaytirilishi mumkin bo’lgan yashash ruxsatnomasiga ega bo’ladi; bundan tashqari, ularning oila a’zolari ham yashash ruxsatnomasini olish huquqiga ega. Ushbu ruxsatnoma asosida chet el fuqarolarining farzandlari Turkiyada ta’lim olishi mumkin. Yashash ruxsatnomasiga ega bo’lish ish topishni ham osonlashtiradi, shuningdek, kompaniyalar uchun ishlash uchun ruxsatnoma rasmiylashtirish jarayoni ham yengilroq kechadi.

Turkiyada mulk sotib olish uchun nima qilish kerak?

Chet el fuqarolari qonunda belgilangan cheklovlarga rioya qilgan holda turar-joy, ofis, arsa, yer uchastkasi va boshqa turdagi ko’chmas mulklarni sotib olishlari mumkin. Agar chet el fuqarosi arsa yoki yer uchastkasi sotib olmoqchi bo’lsa, u ushbu yerda qurilishi rejalashtirilgan inshootning turi to’g’risida 2 yil ichida Atrof-muhit va shaharsozlik vazirligiga ma’lumot berishga majbur.

Chet el fuqarolari uchun mulk sotib olishdagi cheklovlar qanday?

Tegishli qonun hujjatlariga asosan, chet el fuqarolari tomonidan mulk sotib olishga quyidagi cheklovlar qo’llaniladi:

Chet el fuqarosi Turkiyada jami 30 gektardan oshmaydigan ko’chmas mulk sotib olishi mumkin.
Harbiy taqiqlangan hududlar va xavfsizlik zonalarida mulk sotib olish taqiqlanadi. Ushbu hududlarda mulkni ijaraga olish faqat maxsus ruxsat bilan amalga oshirilishi mumkin.
Chet el jismoniy shaxslari, mulk joylashgan tuman umumiy maydonining 10 foizigacha ulushda mulk sotib olishlari mumkin.
Sotib olish maqsadiga mos ravishda foydalanilmayotganligi aniqlangan ko’chmas mulklar hamda qurilish uchun sotib olingan, ammo 2 yil ichida Atrof-muhit va shaharsozlik vazirligiga xabar berilmagan ko’chmas mulklar davlat tomonidan musodara qilinishi mumkin.
O’z mamlakatlarida qonuniy asosda ro’yxatdan o’tgan yuridik shaxslar (kompaniyalar) uchun yuqorida sanab o’tilgan cheklovlar qo’llanilmaydi.

Turkiyada mulk sotib olish tartibi qanday?

Avvalo, kadastr agentligiga (Tapu Müdürlüğü) dastlabki ariza topshirish kerak. Buning uchun navbat raqami olish talab etiladi — 181 raqamiga qo’ng’iroq qilish yoki randevu.tkgm saytiga murojaat qilish orqali ro’yxatdan o’tish mumkin.

Dastlabki ariza qabul qilingach, sotuvchi va xaridor o’rtasidagi mulk o’tkazish jarayoni uchun muayyan sana belgilanadi.

Belgilangan kunda quyidagi hujjatlar tayyorlanishi lozim:

• Mulkning kadastr hujjati / mulk huquqi guvohnomasi (TAPU)
• Mulkni sotib olayotgan chet el fuqarosining pasporti va pasport nusxasi (pasportning o’zbekcha yoki turk tilidagi tarjimasi talab etilishi mumkin)
• Tegishli munitsipalitetdan olinadigan «Ko’chmas mulkni baholash guvohnomasi»
• Uy, ofis va shunga o’xshash binolar uchun majburiy zilzila sug’urta polisi
• Sotuvchidan 1 ta, xaridordan 2 ta fotosurat
• Mulk sotib olayotgan chet el fuqarosi turk tilini bilmasa — qasamyod qilgan tarjimon
• O’tkazish jarayoni chet elda rasmiylashtirilgan ishonchnoma asosida amalga oshirilsa, ishonchnomaning asl nusxasi yoki tasdiqlangan ko’chirmasi (ishonchnomaning turk tilidagi tarjimasi talab etiladi; yurt tashqarisida rasmiylashtirilgan ishonchnomaga apostil qo’yilishi shart).

Mulk ustida ipoteka, ijro ishi yoki boshqa yuridik cheklovlar mavjudligini albatta tekshiring!

Zaruriy ma’lumotlarni kadastr agentligidan (Tapu Müdürlüğü) olishingiz mumkin.

Turkiyada mulk sotib olish uchun yashash ruxsatnomasiga ega bo’lish shart emas.

Ko’chmas mulk sotib olish jarayonida tajribali mutaxassislar bilan hamkorlik qilish doimo xaridor manfaatiga xizmat qiladi. Shu sababli, bu sohadagi ixtisoslashgan maslahat xizmatlaridan foydalanishni tavsiya etamiz. Biz sizga shaxsiy maslahat xizmatini ko’rsatamiz — bizga murojaat qiling.